
马尔巴大师教言集MARPA10རྗེ་བཙུན་ཆེན་པོ་མར་པ་ལོ་ཙྪ་བའི་རྣམ་ཐར།
1-1-83b
༄༅། །རྗེ་བཙུན་ཆེན་པོ་མར་པ་ལོ་ཙྪ་བའི་རྣམ་ཐར།
༄། །དང་པོ་རིགས་སད་པ་རྒྱ་གར་དུ་བྱོན་པའི་ཡོན་ཏན།
བླ་མ་དམ་པ་རིན་པོ་ཆེ་རྣམས་ལ་ཕྱག་འཚལ་ལོ། །ཚད་མེད་བྱང་ཆུབ་སེམས་ཀྱི་རང་བཞིན་ལས། །བྱིན་བརླབས་(རླབས་)མཆོག་གིས་འགྲོ་བའི་དོན་མཛད་པ། །རྡོ་རྗེ་ཐེག་པས་སྨིན་གྲོལ་རྒྱལ་གྱུར་པའི། །སྐྱེས་མཆོག་མར་པ་ལོ་ཚཱའི་(ཙཱའི་)ཞབས་ལ་འདུད། །བྱང་ཆུབ་སེམས་དཔའ་ཀུན་དུ་བཟང་པོའི་སྤྲུལ་པ། ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པའི་སློབ་དཔོན་ཆེན་པོ་ཌོཾ་བྷི་ཧེ་རུ་ཀར་གྱུར་པས་བྱང་ཕྱོགས་ཁ་བ་ཅན་དུ་སྙིགས་མའི་དུས་ཀྱི་སེམས་ཅན་རྣམས་གདུལ་བའི་དོན་དུ་ཐེག་པ་ཆེན་པོ་གསང་བ་བླ་ན་མེད་པའི་སྒོ་ནས་འདུལ་བའི་དུས་ལ་བབ་པའི་ཕྱིར་བྱོན་ཏེ། དེ་ལྟ་བུའི་རྗེ་བཙུན་ཆེན་པོ་མར་པ་ལོ་ཙྪ་བ་ངེས་པ་དོན་གྱི་
1-1-84a
བཀའ་དྲིན་ཅན་འདིའི་རྣམ་པར་ཐར་པ་དཔག་ཏུ་མེད་པ་ལས། འདིར་མདོར་བསྡུས་ནས་སྟོན་པ་ལ་དོན་བརྒྱད་དེ། དང་པོ་རིགས་སད་པ་རྒྱ་གར་དུ་བྱོན་པའི་ཡོན་ཏན་དང་། དཀའ་བའི་སྤྱོད་པ་མཐར་དབྱུང་བའི་ཡོན་ཏན་དང་། རྗེ་ན་རོ་ཆེན་པོས་སྙན་རྒྱུད་ལྷུན་གྲུབ་དུ་(ཏུ་)ལུང་བསྟན་པ་དང་། མདོ་རྒྱུད་ཐབས་ལམ་དུ་ལུང་བསྟན་པ་དང་། བླ་མ་སངས་རྒྱས་བསྟེན་པས་རྒྱུད་པའི་རྩ་ལ་སྙན་པར་གྲགས་པའི་ཡོན་ཏན་དང་། བྱིན་བརླབས་(རླབས་)ཀྱི་དཔལ་གྱིས་ཕྱག་རྒྱ་ཆེན་པོར་ངོ་འཕྲོད་པའི་ཡོན་ཏན་དང་། སེམས་ལ་དབང་ཐོབ་པས་དབང་བསྒྱུར་བའི་ཏིང་ངེ་འཛིན་གྱི་སྣང་བ་ལ་ཐོག་རྡུགས་མེད་པར་ཤར་བའི་ཡོན་ཏན་དང་། རྩ་རླུང་གི་རྩལ་གྱིས་རྣམ་ཤེས་གྲོང་འཇུག་འབྱོངས་པའི་ཡོན་ཏན་དང་བརྒྱད་དོ། །དེ་ལ་དང་པོ་རིགས་སད་པ་རྒྱ་གར་དུ་བྱོན་པའི་ཡོན་ཏན་ནི། ཡུལ་ལྷོ་བྲག་ཆུང་ཁྱེར་གྱི་དཔེ་གསར་བདག་མོའི་ལིང་བ་མེས་པོ་ཕྱུག་པོ་དཀོན་མཆོག་བྱ་བ་ཡིན་སྐད། ཡབ་མར་སྟོན་དབང་ཕྱུག་འོད་ཟེར་བྱ་བ་དང་། ཡུམ་རྒྱ་མོ་འོད་དེ་བྱ་བའི་སྲས་སུ་སྐུ་འཁྲུངས་ཏེ། འབྱོར་པ་ཤིན་ཏུ་ཆེ་བ་ཡུལ་གཉིས་གསུམ་འཛིན་པ་ལགས་སྐད། རྗེ་མར་པ་འདི་གཞོན་པའི་དུས་སུ་ཆང་ལ་དགའ་ཞིང་ཐམས་ཅད་དང་འཐབ་པ་ལ་དགའ་བས། ཡབ་ཀྱི་བསམས་པ་འདི་སློབ་གཉེར་ལ་བཏང་ན་ཞི་བ་ཅིག་འོང་སེམས་ནས་རྩང་ལ་སྟོད་མང་མཁར་མྱུ་གུ་ལུང་དུ་བླ་མ་འབྲོག་མི་ལོ་ཙྪ་བ་རྒྱ་གར་ནས་ཚུར་བྱོན་མ་ཐག་དུ་(ཏུ་)དུས་མཚུངས་ནས་ཁོང་ལ་ཆོས་ཞུས་པས། དགྱེས་མཛད་མཚོས་སྐྱེས་ཀྱི་སྒྲུབ་ཐབས་རེ་ཞུ་བ་ལ་འབུལ་བ་འབྲི་རེ་དང་ཚོགས་འཁོར་རེ་དགོས་པར་འདུག་སྟེ། དེར་རྗེ་མར་པས་བསམས་པས་འདིར་དཀའ་ལས་འདི་ཙམ་བྱེད་པ་བས་ངར་
1-1-84b
ཡང་ལྷོ་བལ་དུ་འགྲོ་དགོས་སྙམ་ནས་དེར་སྐད་ཅིག་གཉིས་བསླབས། ཆ་རྐྱེན་ཐམས་ཅད་གསེར་དུ་བསྒྲུབས་ནས། ལ་སྟོད་དགྱེར་ཕུའི་ཀློག་སྐྱའི་སྟོན་པ་ཅན་དུ་བྱོན། དེ་ནས་ལྷོ་བལ་དུ་བྱོན་ནས། བླ་མ་ཕམ་འཐིང་བ་དང་འཇལ(མཇལ)། །དེར་རྡོ་རྗེ་གདན་བཞི་དང་། དགྱེས་མཛད་ལ་སོགས་པའི་ཆོས་མང་དུ་གསན། བླ་མ་དཔེན་ད་བ་དང་མཇལ་ཏེ་ཆོས་མང་དུ་ཞུས། དེར་ལོ་གསུམ་སོང་བ་དང་བོད་དུ་བྱོན་པས་མང་ཡུལ་དུ་རྒྱགས་སྐྱེལ་དང་འཕྲད། དེར་ཕར་བྱོན་ཏེ་བླ་མ་པེན་ཏ་བ་ལ་གསེར་སྲང་ལྔ་ཕུལ་བས་བརྙེས། ང་ལ་རྒྱ་གར་ན་བླ་མ་སངས་རྒྱས་གཉིས་པ་ལྟ་བུའི་སློབ་དཔོན་ཅིག་(གཅིག་)ཡོད་པ་དེར་སྐྱལ་གྱིས་གསུང་ནས། དེར་དཀའ་སྤྱད་དཔག་ཏུ་མེད་པ་མཛད་ནས་རྒྱ་གར་དུ་བྱོན་ནས། བྷི་ཀ་(བི་ཀྲ་མ་)མ་ཤི་(ཤྰི་)ལ་དང་། །ད་ལྟ་ཞི་ཤྲི་ན་ལེན་ཏྲ་ན་དུས་མཚུངས་པའི་པན་ཌི་(པཎྜི་)ཏ་ཆེན་པོ་བཞིའི་སྒོ་བཞི་སྲུང་བ་དང་། ཤར་སྒོ་བ་ཤན་ཏི་པ་དང་། ལྷོར་ངག་གི་དབང་ཕྱུག་གྲགས་པ་དང་། ནུབ་སྒོ་བ་ཤེས་རབ་འབྱུང་གནས་སྦས་པ་དང་། བྱང་སྒོ་བ་པུ་ལ་ཧ་རི་ཉིད་དོ། །པན་ཌི་(པཎྜི་)ཏ་དེ་རྣམས་གང་ཆེ་བྱས་པས། རྗེ་ན་རོ་པ་ལ་སུས་ཀྱང་འགྲན་དུ་མེད་ཟེར་བས། པུ་ལ་ཧ་རིར་རྗེ་ན་རོ་པ་ཆེན་པོའི་དྲུང་དུ་ཕྱིན་ཏེ་གསེར་གྱི་མ་རྡལ་ཕུལ་ཞིང་ཆོས་ཞུས་བས། །དུས་དེ་ཉིད་དུ་མིང་ཅི་ཡིན་གསུང་ནས་ཤིན་ཏུ་མཉེས་སྐད། དེར་དབང་སྐུར་ཞིང་བྱིན་གྱིས་བརླབས་ཏེ། ལོ་དྲུག་དུ་(ཏུ་)ཐེག་པ་ཆེན་པོ་གསང་སྔགས་ཕ་རྒྱུད་མ་རྒྱུད་ཀྱི་ཆོས་མང་དུ་ཞུས་སོ། །དེའི་དུས་སུ་མངའ་བདག་རྒྱལ་སྲས་མེ་དྲི་བ་ཤར་ཆུ་བོ་གྷ་གའི་འགྲམ་ན་རི་མེ་ལྟར་འབར་བའི་རྩེ་མོ་ན་བཞུགས་པའི་དྲུང་དུ་བྱོན་ཏེ་གྲུབ་པ་སྡེ་བདུན་དང་། སྙིང་པོའི་སྐོར་ལ་སོགས་པ་སྙིང་པོ་དོན་གྱི་གདམ་ངག་མང་དུ་ཞུས་སོ། །
1-1-85a
ནུབ་དུ་(ཏུ་)ལ་ཁེ་ཏྲར་དཔལ་ཡེ་ཤེས་སྙིང་པོ་ཞེས་སྙིང་པོ་ཞེས་བྱ་བ་དབུ་མ་རང་རྒྱུད་དུ་སྨ་བ་ལ་ཡང་འཕགས་པའི་བསྐོར་(སྐོར་)མང་དུ་ཞུས་སོ། །གཞན་ཡང་བླ་མ་དཔལ་སིང་གྷ་གླིང་པའི་ཀུ་སུ་ལི་བ་ཆེ་ཆུང་ལ་སོགས་པ་སྟེ་བླ་མ་ཡང་དུ་བཞུགས་སོ། །དེར་རྗེ་མར་པས་བསམས་པ་ད་ནི་བོད་དུ་ཕྱིན་ལ། གསེར་མང་དུ་བཙལ་ལ་དཔལ་རྡོ་རྗེ་གདན་ལ་སོགས་པའི་རྟེན་ཁྱད་པར་ཅན་འདི་རྣམས་ལ་ཡང་མཆོད་པ་བྱ། བླ་མ་གྲུབ་ཐོབ་འདི་རྣམས་ལ་ཚོགས་འཁོར་དང་། ཕྱག་དུ་(ཏུ་)གསེར་རེ་ཕུལ་བ་དང་མཆོད་པ་ལ་སོགས་པ་བྱ་དགོས་སྙམ་ནས་བོད་དུ་བྱོན་ཏེ། ལ་སྟོད་དགྱེར་ཕུར་གློག་སྐྱ་སྟོན་པ་ཅན་དུ་རྡོ་ཧ་རྡོ་རྗེའི་འགུར་(མགུར་)མཛད། དེ་ནས་ཡུལ་དུ་བྱོན་པར་བྱང་ངོས་འདྲིམས་(འདྲིམ་)ནས་གསེར་བཙལ་ཏེ་བྱང་ནགས་ཤོད་ཡན་ཆད་སྐོར། འཕན་ཡུལ་ཀྱི་དར་ཡུལ་སོགས་ཁང་བྱ་བ་དེར་མར་པ་མགོ་ལེགས་ཚོང་ལ་འོང་བ་དང་མཇལ། ཙམ་ཀླུངས་སུ་སྤྱན་དྲངས། དེར་གསེར་སྲང་བཅུ་གཉིས་ཕུལ་ཏེ། དེར་ཡང་གསེར་སྲང་བཞི་བཅུ་ཙམ་རྙེད། དེའི་དུས་སུ་ནུབ་ཅིག་(ཞིག་)ནི་རྨི་ལམ་ན་རྗེ་ན་རོ་པ་ཆེན་པོ་རྨི་ལམ་དུ་བྱོན་ཏེ་གནད་ཀྱི་སྙིང་པོའི་བརྡའ་བསྟན་པ། ནམ་མཁའི་མེ་ཏོག་སྐྱེས་བུ་ཡིས། །མོ་ཤམ་བུའི་རྟ་ཞོན་ནས། །རྟོགས་པ་རུ་སྤལ་ཐུན་གྱིས་བྲབས། །རི་བོང་རའི་ཕུར་པ་ཡིས། །དགྲ་བོ་ཆོས་ཉིད་གློང་(ཀློང་)དུ་བསད། །ལྐུགས་པ་སྨྲ་ཞིང་དམུན་ལོང་བལྟའ། །འོན་པ་ཉན་ཅིང་ཞའོ་རྒྱུག །ཉི་ཟླ་གར་མཁན་དུང་འབུད་ཅིང་། །འཁོར་ལོ་བུ་ཆུང་བསྐོར་བར་བྱེད། །ཅེས་(ཞེས་)གསུངས་སོ། །དུས་དེ་ཉིད་དུ་མཁའ་འགྲོ་མས་བརྡའ་བཀྲོལ་བ་ནི། མཁའ་འགྲོ་ནམ་མཁའི་མེ་ཏོག་གིས། །སྙན་རྒྱུད་མོ་ཤམ་རྟ་ཞོན་ནས། །བརྗོད་མེད་རུ་སྦལ་ཐུན་བྲབས་ཏེ། །སྐྱེ་
1-1-85b
མེད་རི་བོང་ཕུར་པ་ཡིས། །རྣམ་རྟོག་ཆོས་ཉིད་ཀློང་དུ་བསད། །ཏེ་ལོ་ལྐུགས་པ་སྨྲ་བསམ་བརྗོད་མེད་ཀྱིས། །ནཱ་རོ་དམུན་(མུད་)ལོང་དོན་མེད་དོན་མཐོང་གྲོལ། །ན་རོ་འོན་པ་ཆོས་ཉིད་ཆོས་སྐུའི་རི་བོ་ལ། །བློ་གྲོས་ཞའོ་འོད་གསལ་འགྲོ་འོང་མེད་པར་རྒྱུག །ཉི་ཟླ་བཅོམ་ལྡན་ཀྱེའི་རྡོ་རྗེ་ལ། །གར་མཁན་སྒྱུར་བྱེད་དུ་མ་རོ་ཅིག་(གཅིག་)ཡིན། །དུང་ནི་སྙན་པས་ཕྱོགས་ཅིག་(གཅིག་)སྒྲོགས་བྱེད་པ། །འབུད་པའི་ཡུལ་མི་སྣོད་ལྡན་རྣམས་ལ་འབུད། །དཔལ་ལྡན་སྡོམ་པ་བདེ་མཆོག་འཁོར་ལོར་བསྟན། །ཡིད་བཞིན་ནོར་བུ་འདྲ་བའི་སྙན་རྒྱུད་བུ་ཆུང་ཞེན་མེད་སྐོར། །ཞེས་པས་བརྡའི་དོན་ཀྲོལ་(དཀྲོལ་)ཞིང་དེ་དག་ཁོང་དུ་ཆུད་དོ། །
༄། །དཀའ་བའི་སྤྱོད་པ་མཐར་དབྱུང་བའི་ཡོན་ཏན།
གཉིས་པ་དཀའ་བའི་སྤྱོད་པ་མཐར་དབྱུང་བའི་ཡོན་ཏན་ནི། དུས་དེར་ཤིན་རུ་མྱུར་བའི་བརྩམས་ཏེ་རྩང་ནས་ཡར་བྱོན་པའི་དུས་སུ། ཉང་སྟོད་བཞེངས་ཀྱིས་མཁར་གོང་དཀར་པོ་བྱ་བར་ཇོ་བོ་རྗེ་ལྷ་ཅིག་(ཞིག་)དབུས་སུ་བྱོན་པ་དང་མཇལ་ཏེ་དེར་དོ་ཤེས་པར་བྱུང་ནས། ཇོ་བོ་ཉིད་དང་པོ་བླ་མ་ལྡོམ་བྷི་བ་བྱ་བ་རྗེ་ན་རོ་པའི་སློབ་མ་ཅིག་(ཞིག་)གོས་བྱིན་གྱིས་རླབས་(བརླབས་)ནས། ཕྱིས་རྗེ་ན་རོ་པའི་ཞལ་སློབ་དངོས་སུ་གྱུར་པའོ་ཞེས་གསུངས་སྐད་དོ། །སྔར་རྗེ་ན་རོ་པའི་སྤྱན་སྔར་རྒྱལ་རིགས་ཀྱི་པན་ཌི་(པཎྜ་)ཏ་ཡིན་ཟེར་བའི་གཟུགས་བཟང་བ་ཅིག་(ཞིག་)སྐབས་སྐབས་སུ་གདམ་ངག་ཞུར་འོང་བ་དེ་ཡིན་པར་འདུག་སྟེ་གཉིས་ཀ་དགྱེས། དེར་ཇོ་བོ་ལ་དབང་ཉན་ཚོང་གནས་སུ་རིན་ཆེན་ཙ་ཀྲ་ཞུས་ནས། རྗེ་མར་པས་སྙོས་འབྱུང་པོ་ད་བཟོད་(གཟོད་)ལོ་ཙཱ་སློབ་དུ་(ཏུ་)འགྲོ་བ་དང་འགྲོགས་ནས་བལ་ཡུལ་དུ་བྱོན་ནོ། །དེ་ནས་བསྙོས་(གཉོས་)རྒྱ་གར་དུ་སྔོན་ལ་སོང་། དེར་རྗེ་མར་པས་བླ་མ་ཕམ་ཐིང་བ་དང་། པེན་ཏ་བ་ལ་སོགས་པ་ལ་མེ་ཏོག་ཕུལ། ཚོགས་འཁོར་མང་དུ་ཞུས་གསོལ་བ་བཏབ་ནས། བཟོང་རྒྱ་
1-1-86a
གར་དུ་བྱོན་ནས་རྒྱལ་བ་མེ་དྲི་བ་དང་། དཔལ་ཡེ་ཤེས་སྙིང་པོ་དང་། བླ་མ་རྣམས་ལ་གསེར་གྱི་མཎྜལ་ཕུལ། དེ་ནས་པུ་ལ་ཧ་རིར་བྱོན་ཙམ་ནས། རྗེ་ན་རོ་པ་སྤྱོད་པ་ལ་གཤེགས་ནས་མི་བཞུགས་པར་གདའ་སྐད། སྔར་གྱི་དུས་སུ་རྗེ་ན་རོ་པ་དེ་ཐུན་བཞིར་ཐུགས་དམ་མཛད་ཅིང་། ཐུན་བར་དུ་བཤད་པ་མཛད་པ་ཡིན། དེ་ནས་རྟེན་དང་དཔེ་ཐམས་ཅད་སྤོང་ཐག་བྱས་ཏེ་ལོ་ཙྪ་བའི་སྐལ་བ་ལ། ཧེ་བཛྲའི་ཐང་སྐུ་ཅིག(གཅིག) །གསང་བ་འདུས་པ། དགྱེས་མཛད་འཁོར་ལོ་བདེ་མཆོག་གསུམ་གྱི་རྩ་རྒྱུད་གསུམ། ཀ་པ་ལ་ཅིག(གཅིག) །བསག་ཀ་ལི་ཅིག་(གཅིག)དང་གདུགས་ཅིག་(གཅིག)དང་རྣམས་བཞག་ནས་འདི་ཚོ་བོད་ཀྱི་ལོ་ཙྪ་བ་ཅིག་(ཞིག་)ཡོད་པ་དེ་འོང་བ་ཡིན་པས་དེ་ལ་བྱིན་ཅིག་གསུང་ནས་གཏང་ངོ་། །རྗེ་ན་རོ་པ་ཉིད་རས་ཀྱི་ཨང་ཀ་རེག་ནག་པོ་ཅིག་(ཞིག་)དང་། ཁྲི་གཉན་ས་ལེའི་ལྤགས་པ་སྨད་བཀྲིས་ཅིག་བསྣམས། ཌ་མ་རུ་དང་ཕྱག་རྒྱ་ལྔ་དང་ཐོད་པ་བསྣམས་ནས་སྤྱོད་པ་མཛད་དེ། སློབ་མ་རྙིང་པ་རྣམས་ཀྱིས་ཚོགས་འཁོར་གྱི་དཔོན་མཛད་པ་ཙམ་གནང་། ཆོས་མི་བདེ་བའི་སར་བ་ཙམ་འདྲི་བ་དང་། བྱིན་བརླབས་(རླབས་)ཙམ་མ་གཏོགས་པ་བློང་པའི་སྤྱོད་པ་ལ་ཞུགས་ནས་ཐམས་ཅད་ལ་བྷཻ་ཧེ་ཡ་བླང་བླང་གསུང་བས། དུས་ཚོད་ཅིག་ཙམ་ན་ཇག་པ་ཚན་ཅིག་དང་ཕྲད་ནས་བླང་བླང་བྱས་པས་ཆུ་གྲི་རྣོན་པོ་བཞི་བྱིན་པས་ཐོད་པར་བཅུག་པས་ལྕགས་སླང་ཚན་མོར་མར་བཅུག་པ་བཞིན་དུ་བདུད་རྩིར་མེར་གྱིས་ཞུ་ནས་གསོལ་སྐད། ཡང་དུས་རེ་ཤིག་རྣལ་འབྱོར་པ་ཅིག་(ཞིག་)ལ་བླང་བླང་བྱས་པས་ཌ་མ་རུ་ཅིག་(ཞིག་)བྱིན་པ་དང་། གྲི་གུག་ཅིག་བྱིན་པ་ཡང་ཐོད་པར་བཅུག་པས་ལྟེམས་ཀྱིས་བཞུ་ནས་གསོལ། དེ་ནས་རྗེ་མར་པ་ལོ་ཙྪ་བ་བྱོན་ཙ་ན་ཡུལ་ཉི་ཤུ་རྩ་བཞིའི་དུར་ཁྲོད་རྣམས་སུ་སྤྱོད་པ་མཛད་ཅིང་ངེས་པ་མེད་པར་བཞུགས་པའི་
1-1-86b
དུས་སུ། ཉེ་གནས་དགེ་ཚུལ་ཤེས་རབ་སེང་གེ་བྱ་བས་སྤོང་དག་སྐལ་བ་རྣམས་གཏད། དེ་ནས་རྗེ་པེན་ཏ་བ་དང་འགྲོགས་ནས་འཚོལ་དུ་བྱོན་པས་རྒྱ་གར་ལྷོ་ཕྱོགས་སུ་དཔལ་གྱི་རི་དང་། ཉེ་བའི་གནས་སུ་ཨོ་ཊེ་བི་ཤའི་ཡུལ་དུ་མཇལ་ཏེ། དེའི་དུས་སུ་དཔལ་གསང་བ་འདུས་པའི་ཆོས་བཤད་རྒྱུད་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ཤུ་ལོ་(ཤླཽ་)ཀ་སུམ་སྟོང་ལྔ་བརྒྱ་པ་གནང་། དེའི་དཔེ་དུལ་ཁེ་དྲར་དཔལ་ཡེ་ཤེས་སྙིང་པོ་དང་། དཔལ་སིང་ག་གླིང་པ་ལ་ཡང་བྱུང་། དུས་དེར་སྒྱུར་བ་ཡིན་སྐད། དེ་ནས་རྒྱལ་བ་མེ་ཏྲི་བའི་དྲུང་ནས་ཀྱང་ཆོས་མང་དུ་ཞུས། དུས་དེ་ཙམ་ན་སྙོས་འབྱུང་པོ་དེ་དཔལ་ན་ལེན་ཏྲའི་བླ་མ་བྷ་ལིང་ཨ་ཙརྱ་བྱ་བ་གཏོར་མའི་དངོས་གྲུབ་བསྙེས་(བརྙེས་)པ། གཤིན་རྗེ་གཤེད་ནག་པོ་ཞལ་གཟིགས་པ་(ཞིག་)ཅིག་ཡོད་པ་དེ་ལ་ཆོས་མང་དུ་ཞུས་སོ། །དེ་ནས་རྗེ་མར་པ་རྒྱ་གར་ཤར་ཕྱོགས་བྷ་གྷ་ལ་ན་ཇོ་བོ་འཁང་སར་པ་ནི་རང་བྱུང་གི་ལྷ་ཁང་གཟིགས་སུ་བྱོན་པ་དང་། སྨྱོས་འབྱུང་པོ་དང་ཕྲད་གླེང་གླངས་བྱ་འདོད་པ་ལ། དེ་ཅོ་པ་རའི་ཁང་པ་ཅིག་(ཞིག་)དུ་ཆ་སྐྱེན་(རྐྱེན་)བག་ཙམ་གྱིས་ཟས་སྣ་མང་པོ་ཉོས་ནས་བསྙེན་བཀུར་བྱས་ཏེ་ལོ་རྒྱུས་དྲིས་པས། གཞན་ཐམས་ཅད་ལ་དེ་ཙམ་ལས་མཁས་པ་ཁོ་ནར་མི་བདའ། མ་ཧ་མ་ཡ་ལ་བག་དྲག་ཙམ་བྱུང་བས། ཕྱིས་རྗེ་ན་རོ་པ་ལ་མ་ཧ་མ་ཡ་ལ་ནན་ཆགས་སྐྱར་ནས་ཞུས་པ་དང་། ང་ཤད་མི་ཁོམ་པས་ལྷོ་ཕྱོགས་དུག་མཚོ་གླིང་ཀླག་ཤའི་ཚལ་ན་དཔལ་ཞི་བ་བཟང་པོ་ཞེས་བྱ་བ་དཔལ་ཀུ་རུ་ཀུལླེ་ན་སྭ་བརྒྱུད་པ་ཉེ་བ་ཅིག་(ཞིག་)ཡོད་པས་དེར་ཞུས་ཅིག །དེ་ཡང་ཤིན་ཏུ་གཟུགས་མི་མཛེས་པ་ཅིག་(ཞིག་)ཡོད་པས་ལམ་བསྒྲོད་(བགྲོད་)པར་དཀའ་བ་ལ་བྲམ་ཟེའི་ཁྱེའུ་གསེར་འཕྲེང་ཅན་བྱ་བ་དང་སྦྲགས་ཏེ་རྣལ་འབྱོར་པ་གཉིས་
1-1-87a
ཀྱིས་ཅིག་(གཅིག་)གིས་དུག་གིས་མི་ཚུགས་པར་བྱིན་གྱིས་བརླབས། ཅིག་(གཅིག་)གིས་ལྷ་འདྲེས་མི་ཚུགས་པར་བྱིན་གྱིས་བརླབས་ཏེ་བྱོན་ནས། ཟླ་བ་ཕྱེད་ཀྱི་བར་དུ་དབང་གདམ་ངག་དང་བཅས་པ་ཞུས་ཏེ་ཚར་བར་གནང་ངོ་། །དེ་ནས་དཔལ་གསང་བ་འདུས་པ་འཕགས་པ་སྐོར་ལ། དཔལ་ཡེ་ཤེས་སྙིང་པོ་དང་། སིང་ག་གླིང་པ་དང་རྗེ་ན་རོ་པའི་ལུགས་རྒྱ་ཆེན་པོ་དེས་སྒྲོན་གསལ་ལ་སོགས་པའི་ཆོས་རྣམས་ཚར་བར་མཛད་དེ། རྗེ་ན་རོ་པའི་དྲུང་དུ་དཔལ་གསང་བ་འདུས་པ་རྒྱས་པར་རིགས་བསྡུས་པའི་དབང་ཆེན་མོ་དང་། གཞན་ཡང་དབང་དང་བྱིན་བརླབས་(རླབས་)ཀྱི་བཀའ་དང་། དཔལ་སྒྱུ་མ་བདེ་མཆོག་རྒྱལ་པོ་ཨིན་ཏྲ་བྷོ་དྷི་ནས་རྒྱུད་(བརྒྱུད་)པ་དང་། སངས་རྒྱས་ཐོད་པའི་རྒྱུད་དཔལ་ས་ར་ཧ་ནས་བརྒྱུད་པའི་ལུགས་དང་བཅས་པ་དང་གདམས་པ་ཡང་མང་དུ་གནང་། ཤོག་དྲིལ་གྱི་གདམས་པ་ཚན་བཞི་ཡང་གསན། བཀའ་བཞི་བརྒྱུད་པའི་གདམས་ངག་དང་ལམ་བསྲེ་བ་གསུམ་ཉོན་མོངས་པ་ལམ་དུ་སློང་བའི་གདམས་ངག་མང་དུ་གསན་ནས་དེ་ནས་བོད་དུ་བྱོན་པར་བཞེད་དེ་བླ་མ་ལ་ཕྱི་ཕྱག་འཚལ་ནས་སྙོས་འབྱུང་པོ་དང་འགྲོགས་ནས་ཆུ་བོ་གྷ་གྷ་ལ་གྲུ་བཏང་ནས་ཕྱིན་པའི་དུས་སུ་སྙོས་ཀྱིས་བསྐྱོན་བྱས་ནས་དཔལ་གསང་བ་འདུས་པའི་སྐོར་རྣམས་ཆུ་ལ་སྐུར། ཁོ་ལ་སྐྱོན་ཡོད་པས་ངའི་དཔེ་ལ་བྲིས་པས་ཆོག་ཟེར་རྗེ་མར་པས་ཀྱང་བདེན་སྙམ་ནས་བལ་ཡུལ་དུ་བྲི་བྱས་པས། ད་བོད་སླེབ་ནས། བྱ་ཟེར། རིམས་ཀྱིས་འོངས་པས་ཁ་རག་དུ་(ཏུ་)སླེབ་པ་དང་། རྟ་ཁྲབ་དང་གསེར་གཡུ་མང་དུ་ཕུལ་ནས། ད་དེ་སྐད་མ་ཟེར་ཁྱོད་མ་རྒྱུད་ཤོད། ཕ་རྒྱུད་བཤད་ན་ང་ལ་ཉན་པ་ག་ལ་འོང་ཟེར་ནས་མ་གནང་སྟེ། དེར་
1-1-87b
ལྷོ་བྲག་དུ་(ཏུ་)བྱོན། དེ་ནས་ཡུལ་དུ་བཞུད་པའི་དུས་སུ་ཡུན་རིང་པོར་མ་ཆགས་ཏེ། དཔལ་གསང་བ་འདུས་པའི་འཕགས་པའི་སྐོར་རྣམས་ཀྱི་དཔེ་མེད་པས་ཐུགས་མ་བདེ་ནས། སླར་གསེར་མང་པོ་སྒྲུབས་ཏེ་རྒྱ་གར་དུ་བྱོན། དེ་ཙམ་ན་བླ་མ་ཕམ་མཐིང་བ་དཔལ་ལྷན་ཅིག་སྐྱེས་པའི་རྡོ་རྗེའི་སྐུ་མཆེད་ལྔ་བཞུགས་པ་ལགས་སྐད། མཆེད་པོ་བླ་མ་སྤྱི་ཐེར་བ། དེའི་འོག་ཏུ་དགེ་སློང་འཇིགས་མེད་གྲགས་པ། དེའི་འོག་མ་དབང་པོ་ཐང་ཆུང་པ་ཟེར་དེ་ནས་བཞི་པ་ཤེས་རབ་བཟང་པོ། ལྔ་པ་བ་གི་ཤྭ་ར། དེ་ལྟར་མཆེད་དེ་རྣམས་བཞུགས་པ་ལ་གཅུང་པོ་རྣམས་ལ་ཚོགས་འཁོར་ཞུས་སོ། །རྗེ་པེན་ཏ་བ་ལ་ཚོགས་འཁོར་མང་དུ་ཞུས་ཏེ་གསོལ་བ་བཏབ་པས་རྨི་ལམ་དུ་མཇལ་བ་རྨིས་པས་བྲོད་པར་བྱུང་སྟེ། རྗེ་ན་རོ་པ་འཚོལ་དུ་འགྲོ་བར་ཞུས་པས། རྗེ་པེན་ཏ་བའི་ཞལ་ནས། ད་ནི་འགྲོ་བ་དག་པས་མཐོང་བ་ཙམ་མིན་པ། སྐུ་ལུས་འཇའ་ཚོན་ལྟར་སོང་ནས་མི་རྙེད་ཉེན་ཡོད། ཅིས་ཀྱང་འགྲོ་ན་ངས་གྲོགས་བྱ་གསུང་ནས། དེར་རྒྱ་གར་དུ་བྱོན་ཏེ་རྗེ་མི་དྲི་བ་ལ་སོགས་པའི་བླ་མ་རྣམས་དང་མཆེད་གྲོགས་ཁྱད་པར་ཅན་རྣམས་ལ་དྲིས་པས། བཙལ་བས་རྙེད་པའི་ངེས་པ་མེད་དེ་གསོལ་བ་ཐོབ་ཅེས་ཟེར་ནས། ཚོགས་འཁོར་དང་མཆོད་པ་བྱས་ཏེ་གསོལ་བ་བཏབ་ཅིང་ཉེ་གནས་གྲོགས་པོ་རྣམས་ལ་སོ་སོར་གསོལ་བ་བཏབ་ཅིང་རྨི་ལམ་དུ་འདེབས་སུ་བཅོལ་བས་རྨི་ལམ་བཟང་བླ་མ་དང་མཇལ་བའི་ལུང་སོ་སོར་བྱིན་ནོ། །དང་པོ་གྲོགས་པོ་པྲད་ཛྙཱ་ར་ཀྲི་ཏ་ལ་སོགས་ཏེ། ཁ་ཆེ་ཛྙཱ་ན་ཀ་ར་དང་། ཁ་ཆེ་ཨ་ཀ་ར་སི་ཏི་དང་ཤར་ཕྱོགས་པ་ཛྙཱ་
1-1-88a
ཨ་ཀ་ར་དང་རྣམས་ཀྱི་ཞལ་ནས། སྒེག་མོ་མེ་ལོང་ཟུར་མིག་བལྟ། །བྱ་ཁྱུང་ཆིབས་ནས་བྱང་ཕྱོགས་གཤེགས། །དེད་དཔོན་གྲུ་རྫིངས་གཏོང་ཞིང་འདུག །དཔལ་ན་རོ་པ་དང་མཇལ་ཏེ་མཆི། །ཞེས་གསུངས་སོ། །བླ་མ་མེ་དྲི་བ་ལ་ཚོགས་འཁོར་ཟླ་བ་ཅིག་(གཅིག་)བྱས་ནས་ཞུས་པས། མཁའ་འགྲོ་མེ་ལོང་བལྟ་ཞིང་འདུག །ན་རོ་བྱ་ཆིབས་རྒྱལ་མཚན་འཕྱར། །བྱ་མགོ་བོད་ཡུལ་བསྟན་པ་རྨི། །དཔལ་ལྡན་ན་རོ་པ་དང་མཇལ་བར་ངེས། །གསུངས་སོ། །དེ་ནས་སློབ་དཔོན་དཔལ་ཞི་བ་བཟང་པོ་ལ་སྒྱུ་འཕྲུལ་ཆེན་མོ་ཞུས་པའི་བླ་མ་ཡིན་པས་ཚོགས་འཁོར་ཞུས་པས། རྗེ་བཙུན་དཔལ་ལྡན་ན་རོ་པ། །གླང་པོ་ཆེའི་གཟིགས་སྟངས་ཀྱིས། །སྤྱན་གཉིས་ནས་ནི་ཉི་ཟླའི་འོད་ཟེར་བོད་དུ་འཕྲོ་བ་རྨི། །དཔལ་ལྡན་ན་རོ་པ་དང་མཇལ་ཏེ་མཆི། །ཁྱོད་ཀྱིས་གདམ་ངག་ཐུན་མོང་མ་ཡིན་པ་ཅིག་(ཞིག་)ཐོབ་ནས་འོང་གསུང་། དེ་ནས་རྡོ་རྗེ་གདན་བཞི་ཞུས་པའི་མཁའ་འགྲོ་མ་ཆུ་ཤིང་གི་གཉེ་མ་ཅན་ལ་ཚོགས་འཁོར་བརྒྱ་རྩ་བརྒྱད་ཞུས་པས། རི་རབ་རྩེ་ནས་དུང་འབུད་ཅིང་། །ལུང་གསུམ་མདོ་ནས་ལམ་སྣ་འདྲེན། །བུམ་ནང་མར་མེ་འབར་བ་ཡིས། །འཛམ་གླིང་ཐམས་ཅད་གསལ་བ་རྨིས། །དཔལ་ལྡན་ན་རོ་པ་དང་མཇལ་ཏེ་མཆི། །ཞེས་ལུང་བསྟན་ཏོ། །ཉེ་གནས་དག་ཚུལ་ཤེས་རབ་སེང་གེ་ལ་ཚོགས་འཁོར་ཟླ་བ་ཅིག་(གཅིག་)ཞུས་པས། ང་ནི་མྱ་ངན་ཐང་ཆེ་ལ། དམུན་ལོང་ཁྲིད་ནས་ཅིག་(གཅིག་)ལ་བསྟན། དེས་ཀྱང་རབ་རིབ་སྐྱོན་བསལ་ནས། །སེམས་ཀྱི་མེ་ལོང་བསྟན་པ་རྨིས། །དཔལ་ལྡན་ན་རོ་པ་དང་འཇལ་(མཇལ་)བར་ངེས། །ཅེས་ལུང་བསྟན་ཏོ། །སྐྱེ་བ་ཡང་སྔ་ལ། རྗེ་ན་རོ་པ་སློབ་དཔོན་བཟང་པོ་ཞབས་བྱ་བ་ཡིན། །མར་པ་རིགས་ལྡན་ཆོས་ཀྱི་ར་ཛ་ཡིན། དེ་དུས་ཀྱི་བླ་མ་
1-1-88b
ཡིན། ཕྱིས་ཚེ་རབས་ཐམས་ཅད་དུ་རྗེས་སུ་འཛིན་པར། དབང་པོ་བྲམ་ཟེ་དགེ་བ་བཟང་པོ་གཉིས་ཀྱིས་སྤང་པོ་(དཔང་པོ་)བྱ་བར་བྱས་སོ། །དེ་རེས་དེ་གཉིས་རི་རི་པ་དང་། ཀ་སོ་རི་པ་གཉིས་ཡིན་པར་མངོན་ཤེས་ཀྱིས་མཁྱེན། ཅིས་ཀྱང་ཞལ་མཐོང་བར་ལུང་བསྟན་ཏོ། །དེ་ནས་བླ་མ་རི་རི་པ་ལ་ཚོགས་འཁོར་ཟླ་བ་ཅིག་(གཅིག་)ཞུས་པས། སྔོན་ཚེ་བྲམ་ཟེ་བཟང་ཞབས་ལ། །རིགས་ལྡན་ཆོས་ཀྱི་རྒྱལ་པོ་ཡིས། །གསོལ་བཏབ་དགེ་བཟང་སྤང་ཙུགས་(དཔང་བཙུགས་)པའི། །འབྲས་བུ་འདི་འོང་མི་མཇལ་མེད། །ཅེས་(ཞེས་)གསུངས་སོ། །ཡང་བླ་མ་ཀ་སོ་རི་པ་ལ་ཚོགས་འཁོར་ཟླ་བ་ཅིག་(གཅིག་)ཞུས་པས། ཡོངས་དག་ཟླ་བའི་དཀྱིལ་འཁོར་གྱིས། །སེམས་ཉིད་ཆོས་སྐུའི་མེ་ལོང་ནི། །མི་གཡོ་པུ་ལ་ཧ་རི་ནི། །ནཱ་རོ་པའི་སྟོན་པར་གྱུར། །ཞེས་ལུང་བསྟན་ཏོ། །དེ་ནས་མེ་ཏོག་གི་དགོན་པར་ཕྱིན་པའི་ནུབ་མོ་བླ་མ་ནཱ་རོ་ཕ་(པ་)སེང་གེ་ལ་ཆིབས་ནས་ཕྱག་རྒྱ་མ་མཉེ་ན་མ་ཏྲི་སི་རི་དང་། གྷུ་ན་མ་ཏི་སི་རི་བྱ་བའི་བུད་མེད་གཉིས་ཀྱིས་གཡས་གཡོན་ནས་བསྟེན་ནས་ནམ་མཁའ་ལ་བཞུད་པ་མཐོང་ནས་གསོལ་བ་བཏབ་པས། ནམ་མཁའ་ལ་སྒྲ་གྲག་སྟེ། །ང་ན་རོ་གཉིས་མེད་ཟུང་འཇུག་སྟེ། །ཕྱག་རྒྱ་གཉིས་ཀྱི་མཐའ་རྟེན་(བརྟེན་)ནས། །ཐབས་དང་ཤེས་རབ་བརྡའ་སྟོན་ཅིང་། །སེང་གེ་ཞོན་ནས་ཉི་ཟླའི། །སྟེང་ནས་གར་བྱེད་གླུ་ལེན་པ། །རྨི་ལམ་འཁྲུལ་པས་མ་སླུས་སམ། །ཅེས་གསུང་ངོ་། །དེ་ནས་དེའི་ཉིན་མོ་ནམ་མཁའ་ལ་ལྟས་པས། གཟུགས་སྐུ་འཇའ་ཚོན་ཙམ་གྱིས་ཝལ་གྱིས་གསལ་ནས། དེར་གསོལ་བ་བཏབ་པས། དད་གུས་རྒྱུན་ཆད་མེད་པའི་རྟ། །བརྩོན་འགྲུས་ལྕག་ཀྱིས་(གིས་)མ་སྐུལ་ན། །གཟུང་འཛིན་རི་དྭགས་དངོས་པོ་ཡིས། །རྒྱར་ཆུད་དངོས་པོས་མི་འཆིང་ངམ། །ཞེས་གསུང་
1-1-89a
ནས་བཞུད་དོ། །ཡང་རྒྱུགས་པས་ཀྱང་མ་སླེབས། མཐོང་ཡང་བཞུགས་སུ་མ་བཞེད། ཤིན་ཏུ་ལུས་ངལ་ཞིང་དུབ་པར་གྱུར་ནས། ཀྭའི་རྗེ་བཙུན་ཅེས་སྨྲེ་སྔགས་འདོན་ཞིང་། ཀྭའི་རྗེ་བཙུན་ཐུགས་རྗེས་མི་གཟིགས་སམ། །སྐྱབས་མེད་ཡལ་བར་འདོར་རམ་ཅི། །སྲོག་ནི་བླ་མ་ཁྱོད་ཀྱི་ཕྱོགས་སུ་གཏོང་། །རྨོངས་པ་མགོ་འཁོར་འདི་ལ་གཟིགས། །ཅེས་(ཞེས་)ཞུས་ཅིང་གསོལ་བ་བཏབ་པས། ཡང་བལྟས་པས་རི་ནག་པོ་ཅིག་(ཞིག་)གི་རྩིབས་སུ་བླ་མ་བཞུད་པ་གཅེར་གྱིས་མཐོང་བས་དེར་ཕྱིན་ཏེ། རང་བྲག་གི་ར་བ་ཅིག་(ཞིག་)གི་ནང་དུ་ཚུད་ནས་ལུས་པ་དང་། ཐམས་ཅད་སྒྱུ་མའི་རྣམ་པ་ལྟར། །གསལ་སྟོང་ངོས་གཟུང་མེད་པ་ལ། །རང་རྒྱུད་བདེན་པར་བཟུང་བས་འཁྲུལ། །དེ་བས་ཀུན་རྫོབ་རང་བཞིན་ནོ། །གསུང་ངོ་། །ཡང་བླ་མ་བྱ་འཕུར་བཞིན་གཤེགས་ནས་ལྟ་བ་ལས་བྱ་རྒྱུ་མེད་པས། ཡང་རྗེ་བཙུན་གྱི་ཞལ་ནས། རྗེས་ནི་བྱ་ལམ་ཇི་བཞིན་དུ། །ངོས་བཟུང་མེད་པར་མ་ཤེས་ན། །ཁྱི་ཡིས་བྱ་འཕུར་རྗེས་སྙེག་བཞིན། །དོན་མེད་ཕྱལ་བར་མི་འཁྱམ་མམ། །ཞེས་གསུངས་ནས་ནམ་མཁའ་ལ་དེངས་སོ། །ཡང་རྒྱུགས་པས་ཀྱང་མ་སླེབ། མཐོང་བས་ཀྱང་བཞུགས་སུ་མ་གནང་། རི་དྭགས་སྨིག་རྒྱུ་ལྟ་བ་བཞིན་སོང་བས། ཆོས་རྣམས་ཐམས་ཅད་ཀུན་རྫོབ་སྟེ། །གཟུགས་བརྙན་ལྟ་བུའི་ཆོས་རྣམས་ལ། །རྒྱུ་འབྲས་བདེན་པ་མ་མཐོང་ན། །དོན་དམ་ཡང་དག་མཐོང་བ་མེད། །ཅེས་གསུང་ངོ་། །དེ་ནས་ཡང་བསམས་ད་ནི་འདིར་འོང་ཅེས་(ཞེས་)པའི་ངེས་པ་མེད་ཀྱང་ཕྱོགས་གར་བཙལ་ན་སྙམ་དུ་སེམས་ཙ་ན། ཡང་ནམ་མཁའ་ལ་སྒྲ་གྲག་པ། གང་ཡང་སྐྱེ་བ་མེད་པའི། །སེམས་ཉིད་ཆོས་ཉིད་ཆོས་སྐུ་རུ། །ཐེ་ཙོམ་སྦྲུལ་འདུད་མ་བཀྲོལ་ན། །རྩེ་
1-1-89b
གཉིས་ཁབ་ཀྱིས་དོན་མི་འགྲུབ། །ཅེས་གསུངས་སོ། །ཡང་གར་བྱོན་བྱོན་དུ་སོང་བ་ལས་ནམ་མཁའ་ལ་གཟུགས་སྐུར་གསལ་ནས། ཡང་དགའ་ནས་གསོལ་བ་བཏབ་པ་ཡང་རྗེ་ན་རོ་པའི་ཞལ་ནས། འཇའ་ཚོན་ལྟ་བུའི་ཞེན་མེད་ལུས། །མཐོང་མེད་ངང་དུ་མ་མཐོང་ན། །དམུན་པོ་ལྟད་མོ་ལྟ་བ་བཞིན། །དེ་དོན་རིག་པར་ག་ལ་འགྱུར། །ཞེས་གསུང་(གསུངས་)ནས་བཞུད་དོ། །དེ་ནས་རི་མུན་པ་ཅན་དུ་ཕྱིན་པས། ངོ་མཚར་ཤེལ་གྱི་ཕ་བོང་ལ། །བླ་མ་གཤེགས་པའི་ཞབས་རྗེས་མཐོང་། །དེ་ནས་ཆུ་ལོན་ཅིག་བྱས་ཁྱེར་སྟེ། །རིན་ཆེན་སྲ་མཁྲེགས་བྲག་ལོགས་ལ། །ཙནྡྣ་གྱི་རྡོ་རྗེ་དཀར་པོ་མཐོང་། །སྡོང་པོ་འདབ་མར་བཅས་པའི། །རང་བྱུང་གི་པདྨ་དམར་པོ་མཐོང་། །ཆུ་ཀླུང་སྣ་ཚོགས་བསིང་མ་ལ། །རང་བྱུང་གི་པདྨ་འབར་བ་མཐོང་། །རྡོ་རྗེ་དང་པདྨ་རྒྱས་པ་དེ། །ཡང་བྱོན་པ་ནི། ངོ་མཚར་ཅན་གྱི་རྟེན་མཐོང་བའོ། །ངོ་མཚར་ཅན་གྱི་རྗེས་གསུམ་ནི། དེ་ཉིད་གསུམ་པོའི་རྗེས་ལ་ཟེར་བའོ། །དེ་ནས་རི་རྩེར་ཕྱིན་པས་རྡོ་ལེབ་གྲུ་བཞི་ཅིག་(ཞིག་)འདུག །དེའི་རྩར་ཞག་བདུན་དུ་གསོལ་བ་བཏབ་པ་ལས། ཞག་བདུན་གྱི་ནང་པར་དངོས་སུ་བྱོན་ཏེ་བརྐྱང་ཕྱག་བྱས། །ཡུས་ཆེ་གསོལ། གསོལ་བ་བཏབ་ནས། ཚོགས་འཁོར་དྲངས་པས་བདུད་རྩི་ཐོད་པ་ཅིག་(ཞིག་)དུ་རྩིབ་མའི་ཐུར་མང་གིས་བསྲུབ་ཅིང་གསོལ་བའི་ལྷག་མ་གནང་ནས་ཟོས་པས་རོ་མཆོག་རྒྱ་དང་ལྡན་པ་ཅིག་(ཞིག་)བྱུང་། བླ་མའི་ཞལ་ནས། བདེ་བ་ཆེན་པོའི་སྣོད་ཆེན་དུ། །བདེ་ཆེན་ལོངས་སྤྱོད་རོ་མཉམ་དག །བདེ་བ་ཆེན་པོར་མ་སྤྱད་ན། །བདུད་རྩིའི་ལོངས་སྤྱོད་འབྱུང་མི་འགྱུར། །ཞེས་གསུངས་སོ། །དེ་ནས་བླ་མ་ལ་གསེར་གྱི་མཎྜལ་ཕུལ་བས། ཡང་རྗེ་བཙུན་ན་རོ་པའི་ཞལ་ནས། སྣང་སྲིད་གདོད་ནས་དག་པ་ལ། །ཆོས་ཉིད་མ་འདལ་མ་
1-1-90a
ཕུལ་ན། །ཞེན་བཅས་རིན་ཆེན་མཎྜལ་ཀུན། །ཆོས་བརྒྱད་སྒྲོག་དུ་(ཏུ་)མ་ཚུད་དམ། །ཅེས་(ཞེས་)གསུངས་ནས་མ་བཞེད་པ་ལ། ཡང་ཡང་བཞེས་པར་ཞུས་པས། བླ་མ་དཀོན་མཆོག་བཞེས་ཅིག་(ཞིག་)གསུང་ནས་ནམ་མཁའ་ལ་གཏོར་རོ། །ཅུང་ཞིག་ཕངས་སེམས་སྐྱེས་པ་ལ། ཁྱོད་འདོད་ན་སླར་ཡང་ཡོད་དོ་གསུང་ནས། ཐལ་མོ་སྙིམ་པ་ཁ་ཕྱེ་བ་དང་སྔར་གྱི་དེ་མ་ཉམས་པར་སྣང་བ་གཏང་བ་ལ། ཡང་སླར་བླ་མའི་སྐུ་ལ་གཏོར་བས་ཚན་ཅིག་དབུ་སྐྲའི་གསེབ་དུ་ཆགས། ཚན་ཅིག་ཐོད་པའི་ནང་དུ་སོང་བ་རྣམས་བདུད་རྩིར་ཞུ་ནས་ཞལ་དུ་གསོལ་གསུང་ངོ་། །ལར་ཐམས་ཅད་ཀུན་ཀྱང་གསེར་གླིང་ཡིན་གསུངས་པས་ཕར་བཞེངས་པ་ནས་ཞབས་བརྡབས་པས་གར་ཕོག་པ་ཐམས་ཅད་ས་གཞི་ཐམས་ཅད་གསེར་དུ་གྱུར་སྐད། དེའི་དུས་སུ་རྗེ་ན་རོ་པའི་དྲུང་དུ་ངོ་མཚར་ཅན་གྱི་མཐོང་ལུགས་བརྒྱད་ཅེས་བྱ་བ་ལ་སོགས་པ་ཤར་ཏེ། དཔལ་དགྱེས་པ་རྡོ་རྗེའི་གདམས་པ་བཤད་པ་ཐུགས་ཀྱི་ཉིང་ཁུ་དང་། རིགས་ལྔའི་དམར་ཁྲིད་དང་། གསང་བ་རིན་པོ་ཆེ་རྒྱས་བསྡུས་དང་། ཇོ་མོ་ལྷན་ཅིག་སྐྱེས་མ་ཡང་གནང་ངོ་། །དེར་རྗེ་ན་རོ་པ་ཆོས་མི་འཆད་པར་འདུག་པས། མི་ཏྲི་བ་ཅན་དུ་ཆོས་ཉན་བཤད་བགྱིས་གསུང་བས། རྒྱལ་བ་མི་(མེ་)ཏྲི་བ་ལ་མཉན་ཅིང་དཔེ་སྒྲུབས་(བསྒྲུབས་)པ་ཡིན་སྐད། ད་ལྟ་རྒྱུད་དང་གདམས་ངག་ཐམས་ཅད་ལ། རྗེ་ན་རོ་པ་དང་མི་ཏྲི་བ་གཉིས་སུ་བྱུང་བ་དེ་ལྟར་ཡིན་ནོ། །དེ་ནས་ཡང་དཔེ་ཐམས་ཅད་རྫོགས་པ་དང་། ཡང་བསྐྱར་ཏེ་གསོལ་བ་བཏབ་ནས་ཚོགས་འཁོར་བྱས་ཏེ། བླ་མ་འཚོལ་དུ་ཕྱིན་པ་ལས། སེང་ལྡེང་གི་ནགས་ཚལ་མཐུག་པོའི་ནང་དུ་མཇལ་ནས། རང་གི་སེམས་དག་བླ་མའི་སྣང་བར་ཤར་ཏེ། ཡང་གང་ནས་ཀྱང་འོངས་པ་མེད། 
1-1-90b
གང་དུ་ཡང་འགྲོ་བ་མེད་པར་ཤེས་དགོས་ཅེས་པའི་དོན་ལ། ཆོས་ཉིད་འོད་གསལ་བྱ་བྲལ་ལྟར། །འགྲོ་འོང་མེད་པར་མ་ཤེས་ན། །རི་དྭགས་སྨིག་རྒྱུ་སྙེག་པ་བཞིན། །དོན་མེད་ཐང་ལ་མི་འབྱམས་སམ། །ཅེས་(ཞེས་)གསུང་སྐད་དོ། །དེ་ནས་ཕྱག་འཚལ་སྐོར་བ་བྱས། ཞབས་སྤྱི་བོར་བླངས་ནས་ཕྱིན་བརླབས་(བྱིན་རླབས་)ཞུས་པས། རྗེ་ན་རོ་པས་བྱིན་བརླབས་(རླབས་)མཛད་དེ། རང་གྲོལ་ཡེ་ཤེས་ཉི་མ་ཡིས། །པུ་ལ་ཧ་རིའི་དགོན་པ་རུ། །བློ་གྲོས་ཞེས་བྱའི་མཚན་ཅན་གྱིས། །བྷོ་ཏའི་མ་རིག་མུན་སོལ་ལ། །ཡེ་ཤེས་སྣང་བས་ཁྱབ་པར་གྱིས། །འདི་སྐད་དུ་བླ་མ་ཏེ་ལོ་བས། རྗེས་སུ་ལུང་བསྟན་པ་ཡོད་པས། བླ་མ་སངས་རྒྱས་གསུང་ཕྱིར་འདོང་གསུང་ནས། བླ་མ་མར་པ་ལོ་ཙྪ་བ་དང་རྗེ་ན་རོ་པ་དང་གཉིས་པུ་ལ་ཧ་རིར་བྱོན་པའི་ལམ་ཀར་འཇིག་རྟེན་པའི་མཁའ་འགྲོ་མ་མང་པོ་བྱུང་ནས། ལོ་ཙྪ་བས་ཆོས་མང་པོ་མཁའ་འགྲོ་མའི་སྲོག་སྙིང་ཟབ་མོ་ཡང་སྙིང་ཐམས་ཅད་བོད་དུ་ཁྱེར་ནས་འགྲོ་བར་འདུག་པས་བར་ཆད་བརྩམས་པ་ལས། རྗེ་ན་རོ་པ་རང་གིས་བར་ཆད་བསལ་བར་མ་ནུས་ནས། རྗེ་ཏེ་ལོ་པ་ལ་གསོལ་བ་བཏབ་པ་ནི། བླ་མས་ལུང་བསྟན་བདག་གི་བུ། །སྣོད་ལྡན་མར་པ་བློ་གྲོས་ལ། །བདུད་ཀྱི་བར་ཆད་རྩོམ་གྱུར་པས། །བྱིན་གྱིས་རློབས་ཅིག་(ཞིག་)རྗེ་བཙུན་མགོན། །ཅེས་བརྗོད་པས། ཏེ་ལོ་པའི་སྤྲུལ་པ་འཇིགས་པའི་ཁྲོ་བོ་དཔག་ཏུ་མེད་པས་མཚོན་ཆ་ཐོགས་པ་རྣམས་ཀྱིས་ནམ་མཁའ་གང་བར་ཤར་ནས། རྔམ་པ་ཧ་ཧ་ལ་སོགས་པའི་རྒད་མོ་སྒྲ་སྒྲོགས་པས། མཁའ་འགྲོ་ཀུན་འཇིགས་ཤིང་སྐྲག་ཏེ་ཚུར་འདུད་ནས། མཁའ་འགྲོ་མ་རྣམས་ན་རེ་འཇིགས་པའི་སྐུ་ལ་འཇིགས་པའི་གསུང་། །འཇིགས་པའི་མཚོན་ཆ་ལེགས་བསྣམས་པའི། །འཇིགས་ཆེན་སྐུ་ལ་སྐྱབས་སུ་མཆི། །བདག་ཅག་
1-1-91a
གནོད་སྐྱེལ་མ་ལགས་ཀྱིས། །ཟླ་བ་བདུན་སོང་ནང་པར་ནས། །རྗེ་བཙུན་དཔལ་ལྡན་ན་རོ་པ། །ཤིང་རྟ་ཆེན་པོའི་རྟ་སྐྱོན་ནས། །པུ་ལ་ཧ་རིའི་ལྡིང་ཁ་ནས། །ཨུ་བརྒྱན་རང་བྱུང་ཕོ་བྲང་དུ། །ལུང་བསྟན་མཁའ་འགྲོས་རང་གྲོལ་བསུ་ཅེས(ཞེས)། དེ་ནས་ཟླ་བ་བདུན་སོང་ཙམ་ན་རྗེ་ན་རོ་པ་དེ་པུ་ལ་ཧ་རི་ནས་ཤིང་རྟའི་ནང་དུ་ཞུགས་ནས། དཔལ་ཨུ་བརྒྱན་(རྒྱན་)དུ་སྤྱན་འདྲེན་པ་ཡིན་ཟེར་ནས་བཟོད་གསོལ་བྱས་སོ། །དེ་ནས་ཁྲོ་བོའི་ཚོགས་དེ་དག་ཐམས་ཅད་འདུས་པ་ལས་འཇའ་ཚོན་འོད་ཀྱི་རང་བཞིན་དུ་གྱུར། དེའི་ནང་སྤྲིན་ཕུང་གི་གསེབ་ནས་རྗེ་བཙུན་ཏེ་ལོ་པ་སྐུ་ཕྱི་ཆད་ཐོན་པའི་ཞལ་རྗེ་མར་པས་གཟིགས་ཏེ་ཆོས་ཚིག་བཞི་པ་ཅིག་(ཞིག་)ཀྱང་ཐོས་གསུང་ངོ་། །མཁའ་འགྲོ་མ་ཀུན་འཇིགས་ཤིང་སྐྲག་ཏེ་སླར་འདུད་པའོ། །དེ་ནས་པུ་ལ་ཧ་རིར་བྱོན་ཏེ། གཞན་གྱིས་མ་མཐོང་བར་ཟླ་བ་བདུན་དུ་དཔལ་གསང་བ་འདུས་པ་འཕགས་པ་ཡབ་སྲས་ནས་ཀྱི་གདམ་ངག་གི་བཤད་པ་རྒྱུད་རྐྱང་གི་ལུགས་དང་། རིམ་ལྔ་གདན་ཐོག་ཅིག་དུ་(ཏུ་)རྫོགས་པར་བསྒོམ་པའི་མན་ངག་དང་། དཔལ་གསང་བ་འདུས་པ་དཔལ་མཆོག་ཆེན་པོའི་དོན་རྣམས་དང་། སྤྲུལ་པའི་དཀྱིལ་འཁོར་དུ་དབང་བཞི་རྫོགས་པར་བསྐུར། ཁྱད་པར་གསང་སྔགས་སྙན་བརྒྱུད་རིན་པོ་ཆེ་རྣམ་པར་གསུམ་གྱི་གདམ་ངག །ཆོས་ཀྱི་གནད་དང་བསྲེ་བའི་གདམས་པ་ཐུན་མོང་མ་ཡིན་པ་མང་དུ་གསུངས། དཔལ་གསང་བ་རིན་པོ་ཆེའི་ཧེ་རུ་ཀའི་དབང་དང་རྗེ་བཙུན་མའི་གསང་བ་སིན་དྷུ་ར་རྡོ་རྗེ་ཡེ་ཤེས་ཀྱི་བྱིན་བརླབས་(རླབས་)དང་། མཁའ་འགྲོ་མའི་བརྡའ་དབང་གི་དབང་བཞི་པོར་སྤྲད་ཅིང་། ཡང་སྙིང་བདེ་མཆོག་སྙན་རྒྱུད་ཀྱི་བྱིན་རླབས་དང་བཅས་པ་གནང་ཞིང་ཟླ་བ་བདུན་པོ་ཐེམ་པ་དང་། གསང་བ་ལུས་མེད་མཁའ་འགྲོའི་གདམས་པ་དགུ་ལ། ལྔ་
1-1-91b
ནམ་མཁའ་ལ་སྐུ་ལུས་མི་སྣང་བར་གསུང་གིས་གནང་། བཞི་པ་མ་རྫོགས་ལ་ཀ་སོ་རི་པ་ལ་ཞུས་གསུང་ངོ་། །དེའི་དུས་སུ་རྗེ་མར་པས་ཕྱག་བྱས་བསྐོར་བ་བྱས་ནས་ཞབས་སྤྱི་བོས་བླངས། ཞབས་རྗེས་ཀྱང་ཞུས་ཏེ། དུས་དེར་བྱིན་གྱིས་བརླབས་པ་ནི། སྙུག་མའི་དོན་མཐོང་རྣལ་འབྱོར་པ། འཁོར་ལོ་བསྒྱུར་རྒྱལ་རིན་ཆེན་འཛིན། རིགས་རྒྱུད་ནམ་མཁའི་མེ་ཏོག་ཡལ། ཆོས་རྒྱུད་ཆུ་བོའི་རྒྱུན་དང་ལྡན། རྒྱུན་ཆད་མེད་པར་འབྱུང་བ་ཡིན། རིམ་ལྔ་གདན་ཅིག་ཆོས་ཉིད་ཅིག་པའི་ཀློང་། ཞེན་པ་རྡོ་རྗེའི་རི་མོ་ཡང་། འཁོར་བ་ཆུ་རིས་རང་ཡལ་འགྱུར། དེ་ནས་ལོ་ཙྪ་བ་ཁྱོད་འཕོ་ཀར་ཡང་ང་འོང་བ་ཡིན། མཁའ་འགྲོ་མ་དུ་མ་དང་བཅས་ནས། ཁྱོད་མཁའ་སྤྱོད་ཀྱི་གནས་སུ་འཁྲིད་པ་ཡིན་གསུང་། ཁྱོད་ཕྱི་མ་ལ་རྒྱ་གར་ཤར་ཕྱོགས་སུ་ཧ་རི་ཀ་པའི་གླིང་དུ་པདྨ་ལ་རྫུས་ཏེ་སྐྱེས་ནས། ལྷོ་དཔལ་གྱི་རི་ལ་ང་དང་ཕྲད་དེ། མི་ཕྱེད་རྦས་པའི་རྡོ་རྗེ་ཅེས་(ཞེས་)བྱ་བར་གྱུར་ནས་སྤྱོད་པའི་གདམ་ངག་གིས་སྐྱེ་བ་དེ་ཉིད་ལ་མཆོག་གི་དངོས་གྲུབ་ཐོབ་པར་འགྱུར་རོ། །ཁྱོད་ཀྱི་སློབ་མ་དང་ཡང་སློབ་ནས་བཟུང་ནས་རིམ་པ་བཅུ་གསུམ་མཁའ་སྤྱོད་ལ་འགྲོ་བར་འགྱུར་རོ་ཞེས་ལུང་བསྟན་ནས། རྗེ་ན་རོ་པ་སྤྱོད་པ་ལ་གཤེགས་གསུང་ངོ་། །དེ་ནས་བོད་དུ་བྱོན་པའི་དུས་སུ་བལ་ཡུལ་དུ་བླ་མ་དང་མཁའ་འགྲོ་ལ་གཏང་རག་གི་མཆོད་པ་མང་དུ་བྱས་ཤིང་སོ་ས་ཀ་བྷི་ཧ་རི་དང་། རིན་ཆེན་ཚུལ་གྱིས་གཙུག་ལག་ཁང་ལ་སོགས་པར་གསོལ་བ་བཏབ་བོ། །དེ་ནས་བལ་བོད་འཚམས་(མཚམས་)སུ་སླེབ་པའི་དུས་སུ་མར་པ་མགོ་ཡགས་ཀྱིས་སུར་འོངས་པ་དང་མང་ཡུལ་དུ་མཇལ་ཏེ། རྗེ་ན་རོ་པའི་པདྨ་དམར་པོའི་ཕྲེང་བ་རྒྱ་རྩ་བརྒྱད་པ་དང་། རྗེ་མངའ་བདག་གི་ཕྱག་གི་
1-1-92a
རྡོ་རྗེ་དྲིལ་བུ་གནང་སྟེ། སྙིང་གཏན་ཆོས་དྲུག་རྡོ་རྗེའི་མགུར་གནང་གསུང་། གདམ་ངག་བཀའ་རྟགས་ཀྱི་ཕྱག་རྒྱ་དང་བཅས་པ་མང་དུ་གནང་ངོ་། །
༄། །རྗེ་ན་རོ་ཆེན་པོས་སྙན་བརྒྱུད་ལྷུན་གྲུབ་ཏུ་ལུང་བསྟན་པ།
གསུམ་པ་རྗེ་བཙུན་ན་རོ་པས་སྣོད་ལྡན་དུ་ལུང་བསྟན་པའི་ཡོན་ཏན་ནི། གསང་སྔགས་ཡིད་བཞིན་ནོར་བུའི། སྙན་རྒྱུད་ཟབ་མོ་མཁའ་འགྲོའི་གསང་། །སྐུ་གསུམ་དབྱེར་མེད་བརྡ་བསྟན་པ། །དེ་དོན་ལྷུན་གྱིས་གྲུབ་པ་ཡིན། ཞེས་གསུངས་སྟེ(ཏེ)། དེའི་དོན་རྗེ་ལོ་ཙྪ་བ་ཆེན་པོ་ཉིད་ཀྱིས་བླ་མ་ལ་མོས་གུས་ཐུན་མོང་མ་ཡིན་པ་ཐོབ་པ་དང་། རྗེ་བཙུན་ཏེ་ལོ་པའི་ལུང་བསྟན་ཐོབ་པའི་གནད་དང་། བྱང་ཕྱོགས་ཁ་བ་ཅན་འདུལ་བའི་རྒྱལ་ཚབ་ལྟ་བུར་བསྐོས་པའི་ཕྱིར། དབང་བྱིན་བརླབས་(རླབས་)དང་བཅས་པ་གནང་། རང་གྲོལ་ཕྱག་རྒྱ་ཆེན་པོའི་གནས་ལུགས་རྟོགས་ཤིང་ཁོང་དུ་ཆུད། དེས་ཐུགས་ནས་ཐུགས་སུ་བརྒྱུད་པའི་ཐུགས་བརྒྱུད། སྙན་ནས་སྙན་དུ་རྒྱུད་(བརྒྱུད་)པའི་སྙན་རྒྱུད(བརྒྱུད)། ཞལ་ནས་ཞལ་དུ་རྒྱུད་(བརྒྱུད་)པའི་དོན་གྱི་བརྒྱུད་པ་ཉམས་སུ་མྱོང་བ་རྒྱུན་མ་ཆད་པ། བྱིན་བརླབས་(རླབས་)ཀྱི་རྒྱུད་པ་ཡོངས་སུ་རྒྱས་པ་ལ། རྒྱ་གར་གྱི་བརྒྱུད་པ་གཉིས་ལས་མ་སོང་། དེ་བས་སྣོད་དང་ལྡན་པར་ལུང་བསྟན་པ་ཐོབ་པའོ།། །།
༄། །མདོ་རྒྱུད་ཐབས་ལམ་དུ་ལུང་བསྟན་པ།
བཞི་པ་མདོ་རྒྱུད་ཐབས་ལམ་དུ་ལུང་བསྟན་པ་ནི། དཔལ་ན་རོ་པའི་ཞལ་ནས་དྲང་དོན་ངེས་དོན་སྙིང་པོའི་དོན་རྣམས་ལས། མཚན་ཉིད་ཕ་རོལ་ཏུ་ཕྱིན་པའི་ཐེག་པ་དང་། འབྲས་བུ་བདེ་ཆེན་ཕྱག་རྒྱ་ཆེན་པོའི་དོན། ཐམས་ཅད་ཐབས་ཀྱི་རྣམ་པར་བསམ་བྱས་ཀྱང་། གསེར་འགྱུར་རྩི་ལྟར་ཐབས་སུ་གོ་བར་གྱིས་ཅིག་(ཤིག་)ཅེས་པའི་དོན་ལ་ཕ་རོལ་དུ་ཕྱིན་པའི་ཐེག་པ་སྣ་ཚོགས་དང་། གསང་སྔགས་ཀྱི་ཐེག་པ་གཉིས་ཀ་སངས་རྒྱས་པའི་ཐབས་འབའ་ཞིག་ཡིན། །
1-1-92b
པས་ཐབས་ལམ་དུ་གོ་བར་གྱིས་ཅིག་(ཤིག་)གསུང་ངོ་།། །།
༄། །བླ་མ་སངས་རྒྱས་བསྟེན་པས་རྒྱུད་པའི་རྩ་ལ་སྙན་པར་གྲགས་པའི་ཡོན་ཏན།
ལྔ་པ་བླ་མ་སངས་རྒྱས་བསྟེན་པས་བརྒྱུད་པའི་རྩལ་སྙན་པར་གྲགས་པ་ནི། ཕྱིར་རྒྱ་གར་དུ་ལོ་རིལ་པོ་བཅུ་དགུ་ངོ་ཉི་ཤུ་ཙམ་བཞུགས་ནས། ཡུལ་ལྷོ་བྲག་ཏུ་གྲོང་པ་དང་གོ་བསྟུན་ནས་བཞུགས་དེར་ཏིང་ངེ་འཛིན་གྱི་རྩལ་རྫོགས་པ་འམ་རྟོགས་པ་དང་ཡོན་ཏན་ཁྱད་པར་དུ་འཕགས་པ་མངའ་སྟེ། གྲོགས་པོ་རྣམས་ཀྱིས་དྲི་སྨེད་བྱས་པའི་དུས་སུ། བླ་མ་གྲུབ་ཐོབ་མང་པོས་ལུང་བསྟན་ཅིང་རྗེས་གནང་ཐོབ། མཁའ་འགྲོ་མང་པོས་བྱིན་གྱིས་བརླབས། །རྟོགས་པ་ཁྱད་པར་ཅན་དང་ལྡན་པས། བརྒྱུད་པའི་རྩལ་སྙན་པར་གྲགས་ཏེ། །བརྒྱུད་པ་སྙན་པར་མི་དྲག་དུ(སྒྲག་ཏུ)། །མཁའ་འགྲོ་ཆོས་ཀྱི་སྤྱན་ཅན་ཡིན། །མེས་པོ་སྙན་པ་མི་སྒྲག་དུ(ཏུ)། །ཏེ་ལོ་སངས་རྒྱས་ཉག་ཅིག་(གཅིག་)ཡིན། །བླ་མ་སྙན་པ་མི་སྒྲག་དུ(ཏུ)། །ན་རོ་ཆོས་ཀྱི་སྤྱན་ཅན་ཡིན། །ང་རང་སྙན་པར་མི་སྒྲག་དུ(ཏུ)། །ན་རོ་ཐུགས་ཀྱི་བུ་ཅིག་(གཅིག་)ཡིན། །གདམ་ངག་སྙན་པར་མི་སྒྲག་དུ(ཏུ)། །ཡིད་བཞིན་ནོར་བུ་རྣམ་གསུམ་ཡིན། །ཁྱད་ཆོས་སྙན་པར་མི་སྒྲག་དུ(ཏུ)། །ཀུན་ལ་མེད་པའི་བསྲེ་འཕོ་ཡིན། །ཀུན་ལ་མེད་པའི་སྙན་རྒྱུད་ཡིན། །ཅེས་གསུངས་སོ། །
༄། །བྱིན་རླབས་ཀྱི་དཔལ་གྱིས་ཕྱག་རྒྱ་ཆེན་པོ་ངོ་སྤྲད་པའི་ཡོན་ཏན།
དྲུག་པ་བྱིན་བརླབས་(རླབས་)ཀྱི་དཔལ་གྱིས་ཕྱག་རྒྱ་ཆེན་པོ་ངོ་སྤྲད་པའི་ཡོན་ཏན་ནི། བརྒྱུད་པ་ཀུན་ལ་ཡོད་མོད་ཀྱིས(ཀྱི)། །མཁའ་འགྲོ་ཡོད་ན་ཡོད་པ་ཡིན། །མེས་པོ་ཀུན་ལ་ཡོད་མོད་ཀྱིས(ཀྱི)། །ཏེ་ལོ་ཡོད་ན་ཡོད་ངེས་ཡིན། །བླ་མ་ཀུན་ལ་ཡོད་མོད་ཀྱིས(ཀྱི)། །ན་རོ་ཡོད་ན་ཡོད་པ་ཡིན། གདམ་ངག་ཀུན་ལ་ཡོད་མོད་ཀྱིས(ཀྱི)། །སྙན་རྒྱུད་ཡོད་ན་ཡོད་ངེས་ཡིན། །བསྒོམས་ན་སངས་རྒྱས་ཀུན་ཀྱང་བརྒྱ(རྒྱ)། །མ་བསྒོམས་རྒྱ་ན་རྒྱ་ངེས་ཡིན། །བསྒྲུབས་པས་གྲུབ་པ་ཡ་མཚན་མེད། །རང་བྱུང་དུ་གྲུབ་ན་ངོ་མཚར་ཏེ། །བཙལ་ན་སངས་
1-1-93a
རྒྱས་ཀུན་ཀྱང་རྙེད། །མ་བཙལ་རྙེད་ན་རྙེད་ངེས་ཡིན། །ཞེས་གསུངས་སོ།། །།
༄། །སེམས་ལ་དབང་ཐོབ་པས་དབང་བསྒྱུར་བའི་ཏིང་ངེ་འཛིན་གྱི་སྣང་བ་ལ་ཐོག་རྡུགས་མེད་པར་ཤར་བའི་ཡོན་ཏན།
བདུན་པ་ཏིང་ངེ་འཛིན་གྱིས་སྣང་བ་ལ་ཐོག་གདུགས་མེད་པར་བསྟན་པ་ནི། གནས་པ་རྩལ་གཡོ་བ་རླུང་། བཀོད་པ་བྱང་ཆུབ་སེམས་ཀྱི་བརྡ། རོ་སྙོམས་ལྕག་གིས་ཡོངས་བསྐུལ་ནས། །འོད་གསལ་འགྲོ་འོང་མེད་པར་རྒྱུག །ཅེས་གསུངས་སོ། །ཡང་འདི་སྐད་དུ། བླ་མའི་མཚན་ཉིད་རྒྱུད་པར་ལྡན། །འཁོར་བའི་མཚན་ཉིད་གཞི་རྩ་བྲལ། །སྣང་བའི་མཚན་ཉིད་སྐྱེ་བ་མེད། །སེམས་ཀྱི་མཚན་ཉིད་ཟུང་དུ་འཇུག །ཅེས་(ཞེས་)གསུང་། ཡང་འདི་སྐད་དུ། འོད་གསལ་བ་ནི་རྒྱུན་པར་གནས། བར་དོའི་གྲོང་ཁྱེར་ངེས་མི་མཐོང་། །གཞན་དོན་གཟུགས་སྐུའི་སྣང་བ་འབྱུང་། ཆོས་སྐུ་སྐྱེ་མེད་སྤྲོས་དང་བྲལ། །ཞེས་གསུངས་སོ།། །།
༄། །རྩ་རླུང་གི་རྩལ་གྱིས་རྣམ་ཤེས་གྲོང་འཇུག་འབྱོངས་པའི་ཡོན་ཏན།
བརྒྱད་པ་རྩ་རླུང་གི་རྩལ་གྱིས་རྣམ་ཤེས་གྲོང་འཇུག་མཛད་པ་ནི། དུས་ཅིག་(གཅིག་)ཙ་ན་ཕུག་རོན་གི་རོ་ཅིག་(གཅིག་)ལ། ལྕགས་ཕུར་གྱི་ཟུངས་ཀྱིས་བརྟོད་ནས་དེ་ལ་གྲོང་འཇུག་མཛད་པས། ཕུག་རོན་ནམ་མཁའ་ལ་པུ་རུ་རུ་བྱེད་པ་ལ་འདི་སྐད་གསུང་། སྒྱུ་མ་ལུས་ཀྱི་བྱེ་ཚབ་བུ། །ཟུང་འཇུག་གཤོག་པར་ལྡན་པའི། །སེམས་ཀྱི་བྱེ་ཆུང་རྩལ་སྦྱངས་པས། །བྱ་སྨད་མ་དང་བུ་རུ་ཕྲད། །ཅེས་གསུངས་སོ། །ཡང་འབྲི་རྒན་མ་ཅིག་(གཅིག་)ཆུ་མིག་གཉན་པོ་ཅིག་(ཞིག་)ཏུ་ཤི་བས། དེ་ལ་གྲོང་འཇུག་མཛད་ནས། སྒོ་རྩར་འོངས་པས་འདི་སྐད་དུ། གནས་པ་རྩ་དང་གཡོ་བ་རླུང་། །བཀོད་པ་བྱང་ཆུབ་སེམས་ཀྱི་རྟ། །རོ་སྙོམས་ལྕག་གིས་ཡོངས་སྐུལ་ནས། །འབྲི་མོ་འཇིགས་པའི་འཕྲང་ལས་བསྒྲལ། །ཅེས་གསུངས་སོ། །ཡང་དུས་ཅིག་(གཅིག་)ན་རྔོན་པ་འགས་ཤ་བ་བརྡས་པའི་རོ་ཅིག་(གཅིག་)རྙེད་དེ། དེ་ལ་གྲོང་འཇུག་མཛད་དེ་ཁྱིམ་དུ་འོངས་ནས་འདི་སྐད་
1-1-93b
གསུང་། བླ་མ་དམ་པའི་གསུང་བཞིན་དུ། །ཡང་དག་གདམས་ངག་ཉམས་བླངས་པས། །དགོས་པ་ཐམས་ཅད་སྒྲུབ་བྱེད་པའི། །ཤ་བ་ཡིད་བཞིན་ནོར་བུ་རྙེད། །ཅེས་གསུངས་སོ། །ཡང་དུས་ཅིག་(གཅིག་)ཙམ་ན། ཡོན་བདག་གི་ཁྱིམ་དུ་ལུ་གུ་ཤི་བའི་རོ་ལ་གྲོང་འཇུག་མཛད་ནས་ལུ་གུ་ཀྱུ་ཕྲེང་ཕྲེང་བྱས་ནས་འདི་སྐད་གསུང་། དུས་གསུམ་སངས་རྒྱས་ཐམས་ཅད་ཀྱིས། །འཆི་མེད་བདུད་རྩིའི་བཅུད་ལེན་གྱིས། །དམ་ཆོས་སྨན་གྱི་སྨན་སྦྱོར་བྱས། །ལུ་གུ་ཤི་སོས་གར་དང་ལྡན། །ཅེས་གསུངས་སོ། །དེ་ལྟར་རྗེ་མར་པ་ལོ་ཙྪ་བ་ཆེན་པོ་དེས། ཐུགས་དམ་གྱི་ལྷ་དཔག་ཏུ་མེད་པ་ཞལ་གཟིགས། མ་འོངས་པའི་གདུལ་བྱ་རྣམས་ལ་དགོངས་ནས། སྣོད་ལྡན་རྣམས་ལ་བློའི་རིམ་པ་དང་སྦྱར་ཞིང་། ཆོས་གསུང་བར་མཛད་དེ། དེས་བར་ལུང་སྟོན་པ་མཛད་དོ། །ལྷན་ཅིག་སྐྱེས་པའི་ཡེ་ཤེས་བདེ་སྟོང་། འོད་གསལ་གྱི་ངང་ལ་མཉམ་རྗེས་གཉིས་སུ་མེད་པར་གློང་དུ་གྱུར་བའི་ངང་ལས། ཤེས་བྱའི་དངོས་པོ་དུས་གསུམ་ཕྱོགས་བཅུ་ཐམས་ཅད་དུ་མ་འདྲེས་པ་གསལ་བའི་མཁྱེན་པའི་ཡེ་ཤེས་ཡོངས་སུ་རྒྱས་པར་བཞུགས་སོ། །འཇིག་རྟེན་ཆོས་བརྒྱད་ལ་སྤྲོས་བཅས་ཀྱི་སྤྱོད་པ། སྒྱུ་མ་ལྟ་བུར་རོལ་བའི་ཚུལ་གྱིས་སྤྱོད་པ་བླ་མ་ཏེ་ལོ་པས་ན་རོ་པ་ལ། རྗེས་སུ་ཟུང་ཅིག་པར་ལུང་བསྟན་པ་ཡང་དང་ཡང་དུ་ཐོབ་པ་སྟེ། བླ་མ་སྐུ་འདའ་ཀར་ཡང་བླ་མ་ཆེན་པོ་ན་རོ་པ་བྱོན་པ་ལ་མཆོད་པ་ཤོམས་གསུང་ནས། དགུང་ལོ་བརྒྱད་བཅུ་(ཅུ་)གྱ་བརྒྱད་བཞེས་ནས་སྐུ་འགྱུར་བའི་ཚུལ་འཕོ་བ་མཛད་དེ། བྱའི་ལོ་རྟའི་ཟླ་བའི་ཚེས་བཅུ་བཞིའི་ཉི་མ་རི་རྩེ་ལ་ཤར་བ་དང་། འོད་གསལ་དེ་ཁོ་ན་ཉིད་ཀྱི་འཕོ་བ་མཛད་དེ། འོད་དང་སྒྲ་དང་། ས་གཡོ་བ་དཔག་ཏུ་མེད་པ་བྱུང་སྟེ། 
1-1-94a
སྐུ་གསུམ་མངོན་དུ་གྱུར་པའོ། །དེ་ལྟར་རྗེ་མར་པ་ལོ་ཙྪ་བ། །ངེས་པ་དོན་གྱི་བཀའ་དྲིན་ཅན། །འགྲོ་བ་རྣམས་ཀྱི་དཔལ་དུ་ཤར། །དེའི་ཡོན་ཏན་ཅུང་ཟད་བསྟན་པ་ལས། །རྣམ་པར་ཐར་པ་བརྡའ་དོན་འགྲོལ་བྱེད། །ཐེ་ཙོམ་སེལ་བྱེད་རིན་ཅེན་སྒྲོན་མེ་ལྟ་བུའོ། །{ཨྚིི}།། །།


